వీధి కుక్క మృతదేహం తొలగించడంలో జాప్యం.. మున్సిపల్ సిబ్బందిపై కాలనీవాసుల ఆగ్రహం

 

ఫిర్యాదు చేసినా స్పందన లేదు.. వీధి కుక్క మృతదేహం తొలగించాలని స్థానికుల విజ్ఞప్తి

బడంగ్‌పేట్, జూన్ 19 (ప్రత్యేక ప్రతినిధి): బడంగ్‌పేట్ మున్సిపల్ పరిధిలోని సాయి కృష్ణ ఎన్‌క్లేవ్ సమీపంలో వీధి కుక్క మృతదేహం  తొలగించకపోవడంతో స్థానిక కాలనీవాసులు తీవ్ర అసంతృప్తి వ్యక్తం చేస్తున్నారు. పంచముఖి హనుమాన్ ఆలయం సమీపంలో, సింధు శ్రీ వరలక్ష్మీ నగర్ – శ్రీ సాయి బాలాజీ టౌన్‌షిప్ ప్రాంతం వద్ద ఒక వీధి కుక్క మృతి చెందిన ఘటన ఈ నెల 19న చోటుచేసుకుంది.

స్థానికుల కథనం ప్రకారం, కుక్క మృతి చెందిన వెంటనే కాలనీవాసులు బడంగ్‌పేట్ మున్సిపాలిటీ అధికారులకు సమాచారం అందించారు. అంతేకాకుండా మున్సిపల్ యాప్ ద్వారా అధికారికంగా ఫిర్యాదు నమోదు చేసి, మృతదేహాన్ని తొలగించాలని విజ్ఞప్తి చేశారు. అయితే ఫిర్యాదు చేసిన   మున్సిపల్ సిబ్బంది నుంచి ఎలాంటి స్పందన లేదని వారు ఆరోపిస్తున్నారు.

రోడ్డు పక్కనే కుక్క మృతదేహం ఉండటంతో దుర్వాసన వ్యాపిస్తోందని, ప్రజారోగ్య సమస్యలు తలెత్తే ప్రమాదం ఉందని స్థానికులు ఆందోళన వ్యక్తం చేస్తున్నారు. ముఖ్యంగా చిన్నారులు, వృద్ధులు ఈ ప్రాంతంలో సంచరిస్తుండటంతో అంటువ్యాధులు వ్యాపించే అవకాశం ఉందని పేర్కొంటున్నారు.

మున్సిపాలిటీకి సంబంధించిన ఫిర్యాదు వ్యవస్థలో సమస్యను నమోదు చేసినప్పటికీ చర్యలు చేపట్టకపోవడం పట్ల కాలనీవాసులు అసహనం వ్యక్తం చేస్తున్నారు. ప్రజారోగ్యానికి సంబంధించిన అంశాల్లో అధికారులు మరింత వేగంగా స్పందించాల్సిన అవసరం ఉందని వారు అభిప్రాయపడుతున్నారు.

ఇప్పటికైనా బడంగ్‌పేట్ మున్సిపల్ అధికారులు స్పందించి, మృత కుక్క కళేబరాన్ని వెంటనే తొలగించి పరిసర ప్రాంతాల్లో పారిశుద్ధ్య చర్యలు చేపట్టాలని కాలనీవాసులు విజ్ఞప్తి చేస్తున్నారు.